Friday, February 15, 2008

not 4 a long time


محتـاجه فتــرة نقاهه أسوي فيـها ريستارت حق كـل شي بالذات عقـلي .. وإسمحولـي بعد الفتـرة الجـايه ماراح أنزل شي جـديد عـندي ظـروف أهمها إنتظار مولود من أختي على هاليومين وبدء الدراسه باجر فـراح أنشغل شوي عن مدونتي بس الأكيد إني مـاراح أقطع عن زيارتكم .. الـراحه بتكون للمدونة تبعي بس مو بزيارتكم إذا الله قدرني :)


وسامحوني عالقصور .. راجعين إنشالله
Selezya

Tuesday, February 12, 2008

söylemek kolay

هالأغنيه كنت أدورها من 6 سنين بالضبط وقبل فترة قصيره لقيتها .. وتوني استوعب اني مو فاهمه ولا شي فيها غير العنوان

söylemek kolay
--- السكـوت افضل ( أعتقد ) يعني هم بعد مو متاكده




Monday, February 11, 2008

علــومي الغبـــرا



تبيــــن علـــومي الغبـرا.. تهمك.. آخر أخبـاري ..!؟

علـــى خبـــرك أبد يا بنت .. أعـــد نجــومي..وأرقبها

أســــاير وقتـــي الظــالم .. وأسـّري ليلــي الســـاري

ولا لـــي بالسهـر مصـلوح .. ســـوى .. صورة أقلبّها

أبـروز صـورتك .. وأخشـــى .. أعلقها على جـداري

يهــــز الـزيـن جـــدراني .. ويفضــح من..يســــربها

ويشــــرب دمــي الصــورة .. بها موتي تــــرا داري

أنا مــا همــني مــوتي ..!! أخـــاف ذنبي يعذبـــــــها

وينـــشدها ضمــير ٍ حــي .. إليــا جــا للهوى طـاري

عــــن أرواح ٍ غــدت بالحب .. وزيـنه .. هو سبـايبها

وقـالت .. يــا بعد حييّ .. صدف بحـري .. ومـحاري

طـعم هالمـوت مـــالذه .. طعــــــون الحب .. جربـها

وشفضحـلك مـن هـمومي ..؟وشفشيـلك من أسـراري

زرعــت الشـوق في غيـري.. ولا أدري وشعــــواقبـها

ولكـن .. صورتي .. تكفـى .. زهر شوقي مع أشجاري

أبيــها تضلل عيــــونك .. وعــيني .. لا تحــــاســـــبها

وقلت المـوت.. من عينك ..! بها سحـــر الهوى جـاري

مــدام المـوت أهو فنـك ..!! أبــيك الـروح تطــــربـها

أبـــد .. لا تهمــك طعوني .. لخناجرها.. أنــا شـاري

حـــلات المـوت بعـــيونك .... تكـــفّـــني حـواجبـــــها

Saturday, February 9, 2008

الـــمرأه




النساء اربعة انواع

1-إمرأه جميله : وهذه تعجب الرجل
2-إمرأه ذكية : وهذه تلهـــــم الرجل
3- إمرأه فاتنة : وهذه تأســر الرجل
4- إمرأه طيبة : وهذه تتزوج الرجل

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثلاثية النساء


قلوب النساء ثلاثة أنواع : قلب يستهدف الرجل ، وقلب يستهدف جيب الرجل ، وقلب ينفتح لكل رجل .
وعقول النساء ثلاثة : عقل يندفع إلى العمل بغير تفكير ، وعقل يفكر ولا يعمل ، وعقل علاه الصدأ لا يفكر ولا يعمل.
وتجمّع النساء على ثلاثة أنواع : إمرأه مع إمرأه : ضرة ، وإمرأه مع رجل : حب . ورجل مع إمرأتين : جحيم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مرآه الرجل

من الأساطير الهندية ، أن الله خلق مخلوقاً قوياً دعاه الرجل ... ثم سأله : هل أنت راضٍ؟ فأجاب : كلا ، فقال الرب : وماذا تريد؟ فأجاب الرجل : أريد مرآه أنظر فيها مجدي ..وعلبة أضع فيها حلاي وجواهري ..ووسادة أتكيئ عليها عندما أتعب ، وقناعا أختبئ وراءه وأنا تعس ، وألعوبه أفرح بها وألهو ، وتمثالاً أملأ عيني بجماله .. وفكره تستفزني ومنارة أهتدي بها
.
فخلق الله ..المرأه

Sunday, February 3, 2008

حبيب .. حبيب !؟

تحديث :
الحكومة تراقب المدوّنات
بعد اقتراح هذا القـرار لفرض الرقابه على المدوّنين .. أنصح أنا سيليزيا جميع أخواني وأخواتي السيـاسيين بقراءة كتـاب كليلة ودمنـة لإبن المقفع لتعلم أصول وفـن الكتـابه على ألسنـة الحيـوانات إلى أن يقـترحوا اقتراحاً آخراً بمنع المدوّنات نهائياً
وكتـاب كليلة ودمنه لمن لا يعرفـه هو مجموعة من الحكايات تدور على ألسنة الحيوانات ويبث من خلالها ابن المقفع آراءه السياسية في المنهج القويم للحُكْم
لنكن كإبن المقفع
----
انااا رديت لعيوونكم انا ردييت ...
مرحبا :) شلوووونكم عسااكم بخيرر
اخواني اخواتي .. اعتذرر عن هالفتره اللي قطعت فيها موو من عوايدي ما انزل بوست طول هالفتره او ما ازوركم بس اعذرووني والله انشغلت ومسؤولية بيت ويهال وريل ووو تعرفون بعد وين اقدر اقطع نفسي مني ولا مناك وهم بعد لابتوبي تنح جم يوم لمن سنعته يعني بالنهايه شغلات وايد يتني فوق بعض وبديت ارتبهم شوي شوي
المهم انشالله اعتذاري مقبول :) وانشالله ما تنعاد
---
حبيب .. حبيب



كلمه منتشره جداً بين فئة الرجال فقط .. وهالكلمة طبعاً ما تنقال إلا بعد مده طويله من رفع ضغطهم لواحد منهم .. يعني مثلا .. تشوفون تجمع من الشباب ربع قاعدين ويسولفون بس القعده ما تحلى لهم الا اذا كان هاليوم مخصص حق رفع ضغط واحد فيهم .. فيقعدون يمسكون عليه اتفه الاشياء وروووووووح اضغط ومايخلوون بالريال المسكين شي .. يعني لو يروح ينتحر اشرف له .. والريال تلقون ويهه صاار حمممر والحااجب حدده مرفوع والاعصاب صاارت تلفانه ما بقى فيه شي ما ضحكوا عليه ..وبعد كل هالهجوم عليه ولما يشوفون ويتأكدون ان الشاب المسكين خلاص اكتفى وزياده من هالضغط يختمونها بكلمة .. حبيب .. حبيب .. مع الابتسامه الكبيره .. وكأن هالشاب ناطر هالكلمه منهم .. لان بمجرد يقولونها .. كل هالاعصاب وكل الغضب وكل الكلام اللي انقال له يتلاشى بسرعه خيالية ويرد الوضع مثل ما كان في البدايه سوالف وغشمره من غير ضغط ..
* الشاب اللي ينحط بهالموقف يحتاج منه روح رياضيه قوية جداً يتحمل فيها كل اللي يجيه

لا تقولون لي انتي شدراج وتشكون فيني لوول بس كفايه يصير هالموقف جدامي كل يوم بين اخواني ودايماً لما يخلصون اقوم انا واهنئ صاحب الروح الرياضيه على هالتحمل والصبر

خلوا روحكم رياضيه ولا تزعلون من أي كلمة .. تجاهلوا الناس اللي ماعندهم غير رفع الضغط واستفيدوا من المواقف .. وتأكدوا إن الإبتسامه أحلى شي فالدنيا :)
وحبيبين .. حبيبين
:p