Friday, October 24, 2008




All of us are waiting for something


So, what are you waiting for?
tell me
;)

Saturday, October 11, 2008

Friday, October 10, 2008

Salamat Datang by Malaysia

Malaysia
Kuala Lumpur
19-8 -2008
3-9-2008
16 days
ETIHAD airways
The National Airline of the United Arab Emirates
7 hours to be in Malasiya
3 Adult
==========
مـاليزيا
العاصمة : كوالالمبور
16 يوم
طيـران الإتحاد
الناقل الوطني لدولة الإمارات العربية المتحدة
مدة الرحله : 7 ساعات من أبو ظبي
ثلاث مسافرين
=========


رحلتي هالسنه كانت متوجهه إلى ماليزيا وحسب المعلومات اللي ذكرتها توه .. رحله عالم من الخيـال .. الأجواء كانت مو طبيعيه.. الدولة خيالية .. كنا متوقعين شي لكن شفنا شي ثاني لما وصلنا .. ماليزيا لا تسمعها من أحد .. روح شوفها بنفسك .. روح وعيش الجو .. لوما اكلهم ولا جان مارديت .. هناك ماودك تنام .. ودك تقوم وتكتشف ماتضيع اي لحظة ... الدوله سياحيه ميه بالميه .. توقعتها دولة فقيره .. طلعنا احنا الفقارى والمساكين .. مو رخيصة .. توقعناها رخص تايلند .. اخرتها نفس اسعار الكويت واغلى بعد .. بس والله تستاهل.. الجو كان خيال خيال خيال .. هناك مطرتهم لو تنزل علينا مدة ساعه بس جان الديره غرقت .. وعندهم ماشالله المجاري شغاله عدل .. يعني تمطر مطره قويه بعد نص ساعه الماي مو عالارض كله نازل بالمجاري .. بررد ومطر وشمس .. تخيلوا عاد انتو :)
شي روعه .. والمطر يومياً طبعا ومدته نص اليوم وبعدها يصير برد ..
ممم شنو بعد .. اي الدولة طبعا إسلاميه .. والاكل اغلبه حلال .. بس طبيعي مطاعمهم مو نفسنا يعني هناك حق اللي بيسووي رجيم تمام .. بس هم لازم تدورون المطاعم العربيه .. احنا ما استوعبنا ان في مطاعم عربية سنعه الا اخر عشر ايام .. في شارع اسمه شارع العرب .. هذا تلقون اغلب العرب يتمشون فيه وفيه مطاعم عربيه يمكن اشهرها مطعم طربوش ومطعم الباشا ومطعم النخيل .. بس للامانه هالمطاعم مو شي اكلهم .. الاكل السنع تلقونه بمكان ثاني بس جو هالشارع ترا حلو معنه ناس وزحمة وكله خليجين بس هم وناسه .. اغلب الحفلات الغنائيه تصير فيه واييبون مغنيين عرب .. احنا يوم وصلنا كانت نوال ورويشد حفلتهم قبل لا نوصل بجم يوم .. طافتنا .. عوضناها بأفريل الامريكيه وواحد لبناني ماعرفت شسمه .. ممم بعد بعد شنوو .. ايي اللغه .. انت راح تتكلم انجليزي علبونه ما يفهمون بس اذا سويتها تطلع انت اللي ماتفهم لانهم عيااارييييييين .. اتعب وانا اتكلم اخرتها يرودون علي بالعربي هني انصدم ودك تلووته كففف لانك مسكين وانت تحاول تعبر .. فروح وتكلم عربي ومالك شغل فيهم والله يفهمون عدل بعد .. انا ذبحوني طول ما امشي بهالكلمه .. جميله جميله جميله .. يننوووني .. واذا مريت صوب المحلات قالو .. جميله جميله تعالي تعالي .. لووول ميانين بس والله يهبلون ..
والكشخه هناك على كيف كيفكم .. مجمعاتهم احلى من مجمعاتنا مليون مره اصلا احنا ما عندنا شي ... السينما هناك الافلام تنزل بلحظتها ..
انا قبل جم يوم داشه بحجز بالسينما ولا القى فلم

babylon

توه نازل هني .. وهناك شايفته ومخلصه وشالوه ونزلو غيره بعد

يعني كل شي يوصل متاخر عندنا


الرحلات مو طبيعيه .. روعه

بحط صور وانتو قيموا :)

======


-

-

هني بمطار ابو ظبي كان ترانزيت ومدته ثلاث ساعات طرنا الساعه 2 ونص الفير

طبعا ثلاث ساعات فاضيه ماعندي شي كسروا خاطري هذيل وصورتهم انا طبعا حدي دايخه وخاطري انام نفسهم بس ماكو مجال للاسف

ركبنا الطيارة

الرحله طويله وانا نمت .. لما قعدت جيكت عالوقت ولا باجي ساعتين وربع .. جيد نومه اربع ساعات

هني عاد ما بقى شي .. وصلنــاهذا فندقنا أول يومين fedreial hotel

خمس نجوم وغالي والخدمه زفت وغرفهم مو نظيفة لاعت جبدي

يومين 300 وشي حق غرفتين

هالصورة من بلوكنه الغرفه على حمام السباحه ومدري شنو مانزلت

هني شوفوا في مجمعين ورا لونهم بني هذا مجمع التايمز سكوير اللي عاليمين واليسار الفنادق واللي متصل بينهم عباره حق مجمع 15 طابق اخر ثلاث طوابق مطاعم والاخير اهو عبارة عن مدينة ترفيهيه الالعاب مو حق يهال كلها العاب كبار
ووو طبعا احنا سكنا من ثالث يوم لي اخر يوم بالفندق اللي عاليمين .. شي عجيب
هذي السياكل عندهم شي اساسي هناك يا سيارات على مستوى يا سياكل ماعندهم نص ونص
ترا ركبت سيكل :P
هذا بيت الملك مالهم مساحته منطقه كامله وفوق هذا مو عاجبه وقاعدين يبنون له واحد جديد هذا الحارس .. لما شافني قام يضحك وانا اصوره جان اروح واصور يمه :p
حسيته وده يقول ممكن اشوفها؟
SunwaY Lagoon
رحلة : صن وي لاجون
هذي أول رحله لنا .. عباره عن مدينة كبيره مجمعات لأرقى الماركات و مدينة مائية ومدينة العاب ووو بعد مدينة حيوانات
اول مادشينه الجو روعه ما مشينا خمس دقايق الا تيينا ذيج المطره اللي ما وقفت :p
قلنا اوهوووووووو مالنا شغل بندش ونلعب وكيفهم عاد
هذي الساعه اهي التذكره وتكون ليزر تدخلني كل مكان

جيكو الجو للحين عالسليم والكل رايق

Scream Park
رحنا بندشه ولا الناس اللي داخل قاموا يطلعون ويصارخون ويبجون انا هني خقيت شصاااير داخل .. الوالد قال كملو خندش دشينا
نظامهم ماكو شي داخل يخوف كلش بس الاضاءه مو حاطين اي شي بس تمشي على خط معين وبين كل خط وخط تلقى عامل علبونه يساعدك بالطريج يقولك يلا دش هني ومن يكون اهو وراك يصرخ عليك صرخه تطيح قلبك .. وبس هذا هو العمال اهم اللي يخوفونك
وهني واضح تغير الجو مره وحده لوول هذيل فلم بروحهم .. قمت اطالعهم ويطالعوني جان اللي عاليمين يقول can i take photo for you?
قلتله لا .. يصير انا اصوركم ؟ كلهم قالو يس يس .. وترا عاجبني اللي بالنص لوول الابتسامه خطيره
هني المدينة المائية .. كان في مجموعة شباب سعوديين عددهم مابين 15 الي 20 طلعو من الماي فجاة وقاموا يغنون واهم يركضون متنا من الضحك على العبط اللي سووه هالصورة غير ان المنظر روعه .. كان الجسر تمشون فيه عادي مشينا وكانت معانا وحده مو صاحيه قامت تمشي وتهزه حيل خرعتنا الله يهداها والماي فيه ضفادع ممم هذا تحطون ريلكم وفيه السمج داخل ياكل اللحم الميت .. سيقانهم تهبل لوول
الغيم :) يسوي داهيه هذا بديرتنا AfaMosa
الرحله الثانية : آفاموسا
رحلة سفاري .. وفيها قرية مائية بعد .. وعروض سرك الحيوانات
هذا الفيل يشيلك بخرطومه .. لا تنصدمون ترا ما سويتها هذا اول عرض سيرك واهم اساسا ثلاث عروض .. عرض الحيوانات وعرض الطيور وعرض الفيله .. الاحلى كان الفيله ..وكان مطر واهم يكملون ويعرضون .. هالنمر قصته قصه .. قععدت ورا بصور لما كانوا مخدرينه ولا واحد يحط ذيله بحضني لا تشوفون شلون فزيت قمت اصرخ وخررررررره عنننننييي .. الموقف كان مو طبيعي كل من شافه بالفيديو مات من الضحك بس لا تلوموني .. انا حدي حدي ارانب وعصافير بس هالمره نمرررررر @@ جيكو على هالضب .. كان تحت وكل ما طقيت على الجام اللي بيني وبينه صعد شوي لمن صار بالشكل اللي تشوفونه :) يمه @@ اسد تكفون هذي وين والاكوابارك وين
:P شوفووو الفررررررق الطبيعه ورا لاعبة دووور
حتى ذررتهم غيررررررررررر لذييذه واللهالرحلة الثالثة : Genting
أحلى ررررررررررررررحله لالالا الرحله اخيييييييييييه لحظة اشرح
جنتنق .. مدينة ألعاب اوكي؟ وين صاايره؟؟؟
صايره بقمة جبل .. تخيلو .. طيب شلون نوصل لها؟؟
غير ان الطريج لها ساعتين ..
تصفط سيارتك بمبنى .. وتركب التلفرييك .. وتصعد لي فوق بالتلفريك لمن توصل لها
الجو فوق ثلج .. جنااااااااااااااان جنااااااااااااان جناااااااااااااااان
بهالصورة راكبين التلفريك وتحتنا الجبال والشلالات بكل مكان تحتنا وااااااو هني صور بعد واحنا صاعدين لها عايش جو :) البنت مو صج طبعا صورة وانت تصور يمها هذي حديقة الزهور لما وصلنا هذيل بس طالعو :) تمتعوا بهالمناظر :) صور من داخل الجنتنق واحنا فوووووووق العالم كله تحت شوفو الابيض اللي ورا فندق الجنتنق .. في ناس يقعدون .. مالومهم كل شي موجود وعالم روعة وفيي سفوووح الجبااال
فووق ان السحاب يمشي بينه همم في طلقة دبوس يعني اصعدد اكثررررررر .. ركبتها اللعبه تونس ولما نوصل فوق يوقفونها تقريبا عشر دقايق يخلونك تشوف المكان تحس نفسك بحلم
كريستن من كالفورنيا .. تعرفت عليه واحنا بالجندول قتلني قلتني قتلني لوول انا واختي نتهاوش عليه ههههههههه قلناله ماتبي كبلز؟ لووول اخييه يالنظرره اخيه يالضحكه اخيييه عالكلام لوول .. احم احم قمنا نصرخ يووو اررر سوو ناايس ونغاازله والحاله حاله .. لااا بعد قلتله ممكن اخذ صورة لك .. عادي قال اوكي الناس تصور صورة وحده .. انا من قال اوكي قمت تشك تشك تشك تشك تشك تشك مليون صورة اهو زهق وحركات ولقطات مره يمين مره يسار مره فوق لوووووووووول اقوله حط ايدك مني لالا مني ههههههه امبيه ترا الحين عنده الكويتيات دفاشه بس شسوي
هني ترا انا وابوي معاه زين ما لميته اويليييي :p
ها عرفتو الحين ليش هالرحله حلوه؟
الرحلة الرابعه : شلالات كوالالمبور
هني القرود عطينا واحد خبز وكانو تقريبا بس خمس .. فجأه صارو عشرين قرد يمنا يبون الخبز شرينالهم ووكلناهم وقاموا يتهاوشون بينهم بين بعض
الشلالات لازم نصعد لها لي فوق فلازم تدخل بالغابات عشان توصل لي المنبع واحنا نمشي شفنا هالشجره شوفو شلون صايره تحت مو جنها حيه؟ وصلنا لي هني وخلاص .. تعبنا حيل الناس يطبون من فوق لي تحت انا بغيت اسويها بس تعرفون يعني خفت يصكني برد لوولالرحلة الخامسة: WonderLand
فيها النافورة الراقصه وعرض التراث الماليزي وبيت الثلج .. هالصورة من داخل البيت
الرحله السادسه : المتحف الاسلامي بماليزيا

لاحظو هالمطعم .. داخل المتحف كل اسبوع يتغدى فيه رئيس الوزراء من فخامته .. المطعم على مستوى مو بطالي :) ما اكلنا منه لوول مطاعمنا احلى :P

==

الرحلة السابعه: حديقة الطيور

.. تمشي والطيور كلها تتمشى يمك على انواعها واشكال عمرك ما شفتها

الرحلة الثامنة : kuala lupur eye

نفس فكرة عين لندن .. شي حلو الجو حزتها كان قوي والمطره بهاليوم طولت بس هممم ركبناا


مم هذي من حفلاتهم مالحقت الا على هالفنان وعلى الامريكية

avril

الساعه تقريبا 1 بليل .. سهارى :p

هذا مجمع فندقنا times square

هني كانو يستعدون حق احتفلات عيد الاستقلال .. الاجواء ممتعه

Spa

قبل لا نرد بجم يوم ختمتها عندهم عشان صج استجمااااااام

هذا معبد الفيلة .. لاااااا إله إلى الله هذا يوم شفته ركضت بروح انقذه حسبالي طايح من فوق يوم قربت ولا يحرك ايده قلت ماااااالت .. بس ترا مالووووومه نايم برا الجو على كيف كيفكم .. زين الله يهدااك حط مخده :p اموووووووووووت على هالوقفة اعووووذ بالله ... هذا نوع لا تسالون عنه لوول رياييل ترووووفه الله على المشيه :) وبس .. هذي العوده إلى أبوظبي بالطياره والله صورت هالصورة وطخيت نمممت لمن وصلنا

إنتقلنا من أبوظبي إلى دبي قعدنا ثلاث أيام اول رمضان وبعدها ردينا هذي بمطار دبي

هذا عاد ترف شفته بمطار دبي صورته وطنشت شوي ولا القاه عند كاونتر الكويت ..لوول راد معانا ونفس الطياره وقاعد جدامنا لوول سويت حركات بالطياره عبيطه حس بنفسه وقام يتميع اكثر لاعت جبدي

==========

والحمدلله على سلامتي

ختاماً :

شكرا لتلفوني العزيز على كل هالصور اللي شفتوهم بيض الله شاشتك

وشكرا لطيران الاتحاد .. أحلى طيران للرحلات الطويله

وشكرا بعد للمرافقين الوالد وأختي

وشكرا للمرشد السياحي : أبو هادي

والشكر بالاول والاخير لله ..

* كل الصور من تصويري حلالا بلالا عليكم