Monday, December 29, 2008

سنـة خيـر ؟ غلـطانين




بسم الله الرحمن الرحيم

أغيثـوا غـزة .. أول جملة أبدي فيها موضوعي بوقت تدمع فيه عيوني وقلبي وكياني للي قاعد يصير بغزة .. سبحان الله هالوطن مو يمك وممكن تكون ماتعرف اي شخص فيه بس فطرة الاسلام تشيج كل اللي فيك ، احساسي فناس دينهم نفس ديني ، لغتهم نفس لغتي ، عاداتهم نفس عاداتي يخليني ما ارضى عليهم بكلمة بس تجرح ، فما بالكم اني اشوفهم يموتون جدامي ولا أسوي شي !! أنا اسفه .. ما اقدر أتحمل وأرضى بهالشي .. تكفوون تكفووون لي متى ساكتين .. لي متى نطالع ومانسوي شي .. لي متى نقعد لاهين باتفه الاشياء .. لي متى نسولف بسوالف بايخه ماتودي ولا تييب .. لي متى بعد اللي صار بغزة الناس تهنئ وتقول كل عام وانتو بخير على السنه اليديدة .. أي سنة يديده تتكلمون عنها ؟ هذي سنه؟ هذي بداية ؟ هذا ضمير؟ هذا تفكير ؟ هذي عقلية؟ هذا دين؟ مابي احد يبارك بهالسنه .. وين الخير ووطن يعتبر وطنا كلنا يموت اغلب شعبه ؟ من منو؟ من اخس خلق الله !

عمري ما ارضى ان احد يمس اهلي بكلمة ولا فعل شر ماهو خير واقعد ساكته .. نفس الشي ما راح ارضى باللي قاعد يصير هناك .. ليش الكويت ما تسوي شي .. ليش المسلمين لا صار شي راحو وسوو مؤتمرات وخرابيط ظاهرية بس ولا يسون شي بعدها .. الجيش الكويتي والعربي ليش قاعد ؟ ليش الكويت تدز صناديق اغاثة فلوس ولا اكل .. غزة ماتبي لا فلوسك ولا اكلك .. تبيك انت ترح وتوقف معاها بوجة الجندي الاسرائيلي .. الجيش خخلوه يروح خلوه يوقف وتعرف اسرائيل ان فلسطين كلها مو بروحها وان في أوطان وراها تصد لاي هجمة .. فدوه لها كل ارواحنا والله مو خسرانين شي كافي جدام ربي اموت شهيد .. والله حرام ياعالم والله والله والله مايصير .. كل ما اشوف اللي صار افكر لو الرسول عليه الصلاة والسلام موجود بهاللحظة شكان راح يسوي وأمته شكانت راح تسوي ؟ وانقهر لما اعرف الاجابة واعرف انها ماراح تصير لان ماعندنا ناس قلبها حي ..

أستملقت حيل تصرف بعض المدونين .. يعلقون عن كلمة د. وليد الطبطائي لما رفع نعاله وعلق انها بوجه العرب المتخاذلين .. فعلاً ناس سطحية لأبعد الحدود .. خلو المضمون وقاموا يعلقون على الحركه .. يبه عسا الله لا يكثر من امثالكم وعقولكم .. خلو عنكم هالتعليقات عالاقل الريال .. قلبــــــه حي ..

سـلام

10 comments:

ZooZ "3grbgr" said...

عسى الله يفك عوقهم

حسبنا الله ونعم الوكيل

يا اخيتي

لقد أسمعت إذ ناديت حياً
ولكن لا حياة لمن تنادي

من تنادين

أمم صلابيخ

:\

الطائر الحر said...

اعانهم الله وفرج عنهم همهم

واعانهم الله على الامه العربية

Enter-Q8 said...

الجيش الكويتي والعربي ليش قاعد ؟ ليش الكويت تدز صناديق اغاثة فلوس ولا اكل

ابوي انتي هدي اعصابك الله يرضى عليك
مالوم اندفاعك و نيتك السليمة
لكن حدث العاقل بما يعقل الله يرضى عليك

جيشك الكويتي يالله يفك نفسه من الجيش العربي المسلم الجار

تبينه يروح غزة اللي قبل كم سنة كان فيها عزاء قصي و عدي وصدام

سؤالك هذا مو للجيش الكويتي
سؤالك هذا توجهينه للدول العربية اللي تمتلك قدرة عسكرية تطحننا فيها و تغزي فيها و تدمر فيها ابناء جلدتهم و دينهم
مثال جار السوء العراقي
و جار السوء الايراني
و حزب الله اللي نزل بشوارع بيروت
و قعد يحذف صواريخ على اسرائيل
و سوريا اللي اذبحتنا بحق الرد بالوقت المناسب


مالوم اندفاعك
كفتاة عربية مسلمة
ولكن واقعك غير غير غير

انا قلتها قبل ما انظر للحماس او فتح على انهم مسلمين او عرب
انظر لهم نظرة انسانية فقط
لأني لو نظرة بالنظرة اللي تتكلمين عنها
كان شفتي رد ثاني

بوفهد said...

انا لله وانا اليه راجعون

حسبي الله ونعم الوكيل

الله يصبر اهل الضحايا على هالمجزره ...صج شي مؤلم

والامه العربيه مازالوا في سبات عميق

يبيلهم زلزال علشان يصحون

الله كريم يارب وينصرنا على الاعداء

:(

Fankooshy said...

الله يكون بعون الضعفاء والمظلومين اينما كانوا
فعلا بعض المدونين يناقشون الامور بسطحية
ويتجاهلون المهم
شكرا اختي الكريمة
وكل عام وانتي بخير

بو محمد said...

اختي سيليزيا
احنا مو كفو
احنا ناس نتكلم فقط و لا نفعل
و الا اللي صار أول و لا زال يحدث لا يرضي الله و لا رسوله و لا أي انسان سوي
و الله القلوب تبكي قبل العيون
التخاذل أختي
الله يتولاهم و لا يوكل أمرهم لا لنا و لا لبشر قط، أسأله أن ينتقم لهم
دمت و الأهل و الأحبة بأحسن الأحوال

Ahmed Al-Sabbagh said...

كل سنة وحضرتك طيبة
احمد من مصر

Shaima'a Alkandari said...

الله يكون بعونهم وينصرهم يارب

kazmawy said...

الله يرحم حالهم وينصرهم على عدوهم اليهود لا حول ولا قوة الا بالله :(

TruTh said...

قلوبنا معاهم
:(
عسى الله يفرجها عليهم و ينصرهم على عدوة الاسلام و الانسانية اسرائيل